Ба ҳама ошиқи девона дилам месӯзад,
Аз ҷафою ғами ҷонона дилам месӯзад.
Хӯша бе дона агар рост шавад то гардун,
Бар чунин хӯшаи бедона дилам месӯзад.
Мешавам ошиқи ҳар сурати беайб, вале
Ба ҳама сирати вайрона дилам месӯзад.
Пир бар даст асо гираду бо риши сафед,
Гар шавад сокини майхона, дилам месӯзад.
Бишнавам, ибни фалон оқилу кардаст хато,
Ба ҳамон оқилу фарзона дилам месӯзад.
Агар аз хонаи ёрони накӯ бар гӯшам
Нарасад хандаи тифлона, дилам месӯзад.
Гиряи зан ба ҳама равшану машҳур, вале
Ба ҳама нолиши мардона дилам месӯзад.
Гоҳ-гаҳ ҳарфи дурӯғе бурун ояд зи забон,
Пас аз он гуфтани афсона дилам месӯзад.
Ту кунун бар ҳама ёрони вафопеша нигар,
Дур гардида чу бегона, дилам месӯзад.
Бинигар сӯхта парвона ҳам аз оташи шамъ,
Сари хокистари парвона дилам месӯзад.
КӮҲЗОД ФАТҲУЛЛО
