Хуршед Фозилов, рӯзноманигори боздоштшудаи тоҷик гуфтааст, ӯро маҷбур карданд, зидди худ гувоҳӣ диҳад ва худро гунаҳкор эълон кунад. Фозилов рӯзи 6 март аз сӯи кормандони КДАМ дастгир шуд ва бо иттиҳоми узвият дар созмонҳои мамнуъ (моддаи 307 иловаи 3 қисми 2-и Кодекси ҷиноӣ) ҳукми боздошташ содир гашт
Дилафрӯз Самадова, вакили дифои рӯзноманигор имрӯз, 7 апрел дар саҳифаи фейсбукаш хабар дод, ки Хуршед Фозилов узвият дар ҳама созмонҳои мамнуъро рад карда гуфтааст, “фаъолияташ дар доираи қонунгузорӣ ва сиёсати кишвар” буд.
дар идома Дилафрӯз Самадова гуфта аст, ки Хуршед Фозилов дар оғоз бо иттиҳоми итоат накардан ба амри корманди ниҳоди қудратӣ (моддаи 479 Кодекси ҳуқуқвайронкунии маъмурӣ) боздошт мешавад.
“Сабабаш ба гуфтаи Хуршед ин аст, ки ӯ дар аввал аз додан ва боз кардани телефон худдорӣ кард, вале баъдан маҷбур шуд, ки телефонро кушояд. Ӯро барои 5 рӯз ба ҳабси маъмурӣ маҳкум карда, дар бинои шуъбаи Кумитаи давлати амнияти миллӣ дар шаҳри Панҷакент нигоҳ медоранд. Дар ин муддат аз ӯ дар бораи фаъолияташ пурсидаанд,”-навиштааст, ӯ.
Ин вакили дифоъ гуфтааст, ки Хуршед Фозилов изҳор дошт, ки ӯро маҷбур карданд, зидди худ гувоҳӣ диҳад ва худро гунаҳкор ҳисобад.
Гуфта мешавад, ки Хуршед Фозилов аз боздошти худсарона, риоя накардани дахлнопазирии шахсӣ ва маҷбуран нишондод додан алайҳи худ, ба додситонии вилояти Суғд шикоят кардааст.Хуршед Фозилов, рӯзноманигори 37-солаи тоҷик, аз минтақаи Зарафшон барои расонаҳо хабару гузориш менавишт ва пас аз нисфирӯзии 6-уми март, дар дохили Идораи меҳнат, муҳоҷират ва шуғли аҳолии шаҳри Панҷакент аз сӯйи афроди ношинос, ки дар тан либоси мулкӣ доштанд, дастгир ва ба сӯйи номаълум бурда шуд.
