МАН САДОИ ОН ЗАНИ ТАППАКФУРӮШАМ…
Шоир: Шифо Амонова
Захму дарди аввалини миллатам,
Дардҳои ҷони модарҳои ӯст….
Аз куҷо миллат чунин уфтод? Мепурсӣ агар,
Як ба аҳволи занону модарони мо нигар…
Ман садои он зани таппакфурӯшам,
Ки зи ночорӣ аз оғилхонаи “бойи диёраш”,
Як зимистон то баҳор,
Закки* ҳайвон мекашонад.
Бар сараш сад бори дунё,
Рӯзгорашро ба заҳмат мекашад бар дӯши худ.
Субҳ то шом мекашад закк,
Мезанад таппак ва таппак мефурӯшад…
Гуфтамаш, ки қиматаш чанд ?
Зери лаб шармиду гуфт:
“50 дирам…
…мефурӯшам, пойпӯшеву китоби баччаро бояд харам…
Худ нахондам..,
Бачаҳо бояд бихонанд….
Чорае нест, шавҳарам аз Русия депурт гашта,..
Панҷ соли умрамон бо сахтиҳо бигзашт… акнун,
Шукр, аммо шукр, оре, як каме аз ранҷҳои худ раҳидем…”
– Аз чӣ шукр? Аз кори таппак..?
Ҳамсарат ё соҳиби анбор шуд?
– На, куҷо?! Шукрам, аз оне ки дубора меравад аз нав муҳоҷир мешавад,
Зиндагиям боз меёбад сару сомони худро…
Офарин, эй хоҳари ғамхору пурбардори ман,
Офарин,эй модари заҳматкаши пуркори ман!
Дарди миллат,
Модарони раҳнигар,
Духтарони бесавод,
Лаб фурӯбаста занони дастнигар…
Кишвари хуршедии мардони майдон,
Кишвари он “мафхари Эрон”,
Амири дудаи Сомон,
Кишвари таппакзану таппакфурӯшон аст акнун,
Кишвари муште хамӯшон аст акнун…
• *Закк – поруи ҳайвонот…
