Хуросонвора
Рустам Ваҳҳоб
Абри Фарвардин расиду шохборон карду рафт,
Дашти сармохурдаро рашки гулистон карду рафт.
Бод нармак бар лаби ҳар ғунча ангуште кашид,
Кӯдакони боғро дар хоб хандон карду рафт.
Нашъае аз бӯйи гул уфтод дар ҷони насим,
Кокулони беди маҷнунро парешон карду рафт.
Субҳдам шабнам хабар аз осмон оварда буд,
Пойдаргилмондаҳоро ҷумла гирён карду рафт.
Бо хуросонвора гулбонге, ки булбул зад саҳар,
Рози ҳастиро аҷаб тафсири осон карду рафт.
Тоҷнек
