Маро, эй дӯст, хатлонӣ садо кун!
Ба меҳри дил бадахшонӣ садо кун!
Зи Дарвозам,зи Хоруғам зи Ванҷам,
Биёю ҳамчу вахёнӣ садо кун!
Ба ҷонам дӯст дорам Бохтарро,
Маро фарзанди ёвонӣ садо кун!
Ба адлу дод ман Нушервонам,
Маро Кисрои Сосонӣ садо кун!
Чаманпарвардаи ин обу хокам,
Маро аз насли Сомонӣ садо кун!
Агарчанде ки ман аз Левакандам,
Ба поси сидқ румонӣ садо кун. Хуҷандиям, ҳисориям, зи Аштам,
Ба маҳфил ҳамчу раштонӣ садо кун!
Зи Дарбандам, валекин дар набандам,
Маро шери найистонӣ садо кун!
Зи Ҳафткӯлам, ман аз Шинги шарифам,
Дилат хоҳад вағаштонӣ садо кун!
Зи насли Восеам, аз Балҷувонам,
Наям меҳмон, ба мизбонӣ садо кун!
Зи Киштудам, зи Воруи латифам,
Табассум созу рухшонӣ садо кун!
Наям ман ёри нонӣ аз бароят, Шафиқу ҳамдами ҷонӣ садо кун!
Манам пазмони рӯи беғуборат,
Ту ҳам манро ба пазмонӣ садо кун!
Зи Масчоҳам, ба Фалғар реша дорам,
Дилат хоҳад зарафшонӣ садо кун!
Маро аз Исфара, ё Истаравшан,
Ба ҳар номе, ки медонӣ, садо кун!
Чу меборад ба сар борони меҳрат,
Маро бо шеъри боронӣ садо кун!
Душанбе қиблаи армони ман шуд,
Маро чун тоҷикистонӣ садо кун!
Исмоили Зарифи
