Хушҳаво, хушрӯю зебоӣ, Бухорои шариф,
Файзбору ҳам дилороӣ, Бухорои шариф.
Номи некат доимо машҳури олам гаштааст,
Чунки маъвои бузургонӣ, Бухорои шариф.
Аҳли олам мулки Сино ҳам мегӯянд туро,
Мулки фотеҳ шоҳ Сомонӣ, Бухорои шариф.
Сарзамини хуррамат, зархезу тиллозор буд,
Манбаи сими Зарафшонӣ, Бухорои шариф.
Собирон бо сабру бардошт бузургон бо хирад
Дур мекарданд ҳама захми Бухорои шариф.
Боз аз нав ҷою манзилгоҳи сайёҳон туӣ,
Саҷдагоҳи хайрхоҳонӣ, Бухорои шариф.
Гарчи нур борад ба болои Мадина аз само,
Мебарояд бар само нур аз Бухорои шариф.
Марямо гуфто, Бухоро, қалби ман пурнур кун,
Тӯтиё созем ба чашм хоки Бухорои шариф.
Маскани илму хирад гардидаӣ ту дар ҷаҳон,
Қувваи ислому ирфонӣ, Бухорои шариф.
Марям Ёдгорова Бухороӣ (соли зода 1937)
