Оятуллоҳ Хоманаӣ: Танҳо роҳи муқобила – шинохти душман аст
Муносибатҳо
Оятуллоҳ Хоманаӣ: «Танҳо роҳи муқобила бо ин тавтиаҳо, шинохти душмани воқеӣ аст»
Оятуллоҳ Хоманаӣ, раҳбари Эрон манбаи аслии ҷанг, ноамнӣ ва теруризм дар минтақа ва дунёи исломро қудратҳои истикборӣ ва дар раъси онҳо Омрико донист ва бо таъкид бар ин ки «ҳадафи онҳо эҷоди фазои танаффус барои режими саҳюнистӣ ва ба фаромӯшӣ супурда шудани мавзӯъи меҳварии Фаластин аст», гуфт: «Танҳо роҳи муқобила бо ин тавтиаҳо, шинохти душмани воқеӣ ва истодагӣ аст.»
Ба гузориши пойгоҳи иттилоърасонии дафтари раҳбари Эрон, Оятуллоҳ Хоманаӣ ба шароити кунунии дунёи ислом ва куштор, ноамнӣ ва инфиҷорҳои хунин дар минтақа ишора кард ва гуфт: «Яке аз масоили муҳим шинохти манбаи хабис ва номубораки мушкилоти имрӯзи уммати исломӣ ва дастҳои пинҳонест, ки теруризмро тарвиҷ мекунанд.»
Вай, бо ишора ба эъломи бароати зоҳирии ҳамаи кишварҳо ва қудратҳо аз теруризм ва ташкили эътилофи дурӯғини мубориза бо теруризм, хотирнишон кард: «Бар хилофи иддаоҳои зоҳирии қудратҳо, онҳо дар амал теруризмро ҳимоят ва тарвиҷ мекунанд.»
Раҳбари Эрон, асли тарроҳиҳо ва фоҷеаофариниҳои истикбори ҷаҳонӣ ва дар раъси он Омрико дар минтақаро, ба фаромӯшӣ супурда шудани масъалаи Фаластин донист ва гуфт: «Онҳо мехоҳанд вуҷуди як ҷуғрофиё ва як миллатро инкор кунанд, дар ҳоле ки Фаластин дорои торихи ҳазоронсола ва миллати Фаластин низ соҳиби як сарзамин аст ва наметавон ин воқеиятро инкор кард.»
Оятуллоҳ Хоманаӣ таъкид кард: «Режими саҳюнистӣ қатъан силии фишорҳоеро, ки ба миллати мазлум ва дар муҳосираи Фаластин ворид мекунад, хоҳад хӯрд.»
Вай афзуд: «Масъалаи Фаластин, масъалаи меҳварии дунёи ислом аст ва ҳеч як аз кишварҳои исломӣ ва ҳатто кишварҳои ғайри исломии бархӯрдор аз виҷдони инсонӣ, набояд онро фаромӯш кунанд.»
Оятуллоҳ Хоманаӣ бо таъкид бар ин ки ҳадафи аслии қудратҳои истикборӣ аз ба роҳ андохтани ҷанг ва ноамнӣ ва теруризм дар минтақа, ба фаромӯшӣ супурда шудани масъалаи Фаластин аст, гуфт: «Мубориза барои озодии Фаластин як муборизаи исломӣ ва ҳамагонӣ аст, ки идома ин ҳаракат вазифаи ҳамаи мусалмонон аст ва қарор додани мавзӯи Фаластин дар чорчӯби як мавзӯи дохилӣ ва арабии сирф коре ғалат аст.»
Тоҷнек
