Раиси Ҷумҳурии Кореяи Шимолӣ: Рабудани раиси ҷумҳури Венесуэла ҷинояти ҷангӣ аст
Байналмилал
Раиси Ҷумҳурии Кореяи Шимолӣ иқдоми рабудани раиси ҷумҳури Венесуэларо ҷинояти ошкори ҷангӣ арзёбӣ кардааст.
Ба гузориши расонаҳои давлатӣ, раҳбари Кореяи Шимолӣ дар изҳороте таъкид намудааст, ки ҳамла ба Венесуэла аз рӯи ҳамаи меъёрҳо ва қоидаҳои байналмилалӣ ҷинояти низомӣ ба шумор меравад. Ба гуфтаи ӯ, боздошт ва интиқоли иҷбории раҳбари як давлати соҳибистиқлол нақзи рӯшани истиқлолият ва соҳибихтиёрии кишварҳо мебошад.
Дар идомаи ин изҳорот омадааст, ки истифодаи неруи низомӣ алайҳи як давлат ва дахолат ба умури дохилии он метавонад паёмадҳои ҷиддӣ ва хатарнок барои суботи минтақаӣ ва ҷаҳонӣ дошта бошад.
Раиси Ҷумҳурии Кореяи Шимолӣ ҳамчунин аз ҷомеаи байналмилалӣ хостааст, ки ба чунин амалҳо вокуниши муносиб нишон диҳад ва аз принсипҳои асосии ҳуқуқи байналмилалӣ, аз ҷумла эҳтиром ба соҳибихтиёрии давлатҳо, ҳимоят намояд.
Ин мавзеъгирӣ дар ҳоле баён шудааст, ки таҳаввулоти марбут ба Венесуэла дар рӯзҳои охир боиси вокунишҳои гуногун дар сатҳи байналмилалӣ гардидааст.
tajnek.com
Тоҷнек
