Вазифа ва масъулиятҳои ҳоким
Достонҳои омӯзанда
Алӣ баъд аз хотимаи ҷанги Ҷамал вориди шаҳри Басра шуд. Дар хилоли айёме, ки дар Басра буд, рӯзе ба иёдати яке аз ёронаш ба номи Алоъ ибни Зиёди Ҳорисӣ рафт. Ин мард хонаи муҷаллал ва васее дошт.
Алӣ, ҳамин ки он хонаро бо он азамат ва вусъат дид, ба ӯ гуфт:
— Ин хонаи ба ин вусъат ба чӣ кори ту дар дунё мехӯрад, дар сурате, ки ба хонаи васее дар охират мӯҳтоҷтарӣ?! Вале агар бихоҳӣ, метавонӣ, ки ҳамин хонаи васеи дунёро василае барои расидан ба хонаи васеи охират қарор диҳӣ; ба ин ки дар ин хона аз меҳмон пазироӣ кунӣ, силаи раҳм намоӣ, ҳуқуқи мусалмононро дар ин хона зоҳир ва ошкоро кунӣ, ин хонаро василаи зинда сохтан ва ошкор намудани ҳуқуқ қарор диҳӣ ва аз инҳисори матомеи шахсӣ ва истифодаи фардӣ хориҷ намоӣ.
Алоъ гуфт:
— Эй амири мӯъминон! Ман аз бародарам Осим пеши ту шикоят дорам.
Ҳазрати Алӣ пурсид:
— Чӣ шикояте дорӣ?
Гуфт:
— Торики дунё шуда, ҷомаи кӯҳна пӯшида, гӯшагир ва мунзавӣ шуда, ҳама чиз ва ҳама касро раҳо карда.
Ҳазрат фармуд:
— Ӯро ҳозир кунед!
Осимро эҳзор карданд ва оварданд. Алӣ ба ӯ рӯ кард ва фармуд:
— Эй душмани ҷони худ! Шайтон ақли туро рабудааст, чаро ба зану фарзанди хеш раҳм накардӣ? Оё ту хаёл мекунӣ, ки Худое, ки неъматҳои покизаи дунёро барои ту ҳалол ва раво сохта, норозӣ мешавад аз ин ки ту аз онҳо баҳра бибарӣ? Ту дар назди Худо кучактар аз ин ҳастӣ.
Осим гуфт:
— Эй амири мӯъминон! Ту худат ҳам, ки мисли ман ҳастӣ; ту ҳам, ки ба худ сахтӣ медиҳӣ ва дар зиндагӣ бар худ сахт мегирӣ; ту ҳам, ки ҷомаи нарм намепушӣ ва ғизои лазиз намехӯрӣ; бинобар ин, ман ҳамон корро мекунам, ки ту мекунӣ, ва аз ҳамон роҳ меравам, ки ту меравӣ.
Ҳазрат фармуд:
— Иштибоҳ мекунӣ. Ман бо ту фарқ дорам. Ман мақоме дорам, ки ту надорӣ. Ман дар либоси пешвоӣ ва ҳукуматам. Вазифаи ҳоким ва пешво вазифаи дигаре аст. Худованд бар пешвоёни одил фарз карда, ки заифтарини табақоти миллати худро миқёси зиндагии шахсии худ қарор диҳанд ва он тавре зиндагӣ кунанд, ки тиҳидасттарин мардум зиндагӣ мекунанд, то сахтии фақр ва тиҳидастӣ ба он табақа асар накунад. Бинобар ин, ман вазифае дорам ва ту вазифае.
(Манбаъ: Достони Ростон, таълифи шаҳид Мутаҳҳарӣ)
tajnek.com
Тоҷнек
