Ба ҳамин далел, Яман пирӯз ва душманонаш шикаст хоҳанд хӯрд
Ёддошти Сайидюнуси Истаравшанӣ
Аз бомдоди имрӯз, пас аз он ки дар пайи ҳамлаи нерӯҳои мусаллаҳи Яман ба фурудгоҳи Риёз, шуморе кушта ва шуморе ҳам захмӣ шуданд ва ба фурудгоҳи байналмилалии Риёз осеби ҷиддӣ ворид шуд, аз Тромп ва мақомҳои урупоӣ бигир то “уламои” дарборӣ ва салафиҳо ҷиғу додашон дунёро пур карда, ки айюҳаннос! Ҳусиҳои “ситамгар” ва “золим” моро нобуд мекунанд; мубаллиғони салафӣ “ояту ҳадис” меоваранд, ки “ҷиҳод” алайҳи Ҳусиҳо ва Эрон фарз аст ва набояд сокит нишаст ва аз ин ҳарфҳо.
Ва ин дар ҳоле аст, ки нерӯҳои мусаллаҳи Яман ду ҳафта аст, ки ба такрор ҳушдор медиҳанд, ки аз ин пас ҳавои Арабистони Саудӣ ба ҷуз Макка ва Мадина ноором аст ва дар тирраси мушакҳои яманӣ қарор дорад ва ширкатҳои ҳавопаймоии ҷаҳон парвозҳои худро лағв кунанд ва аҳаде ба ин фурудгоҳҳо наздик нашавад!
Хуб, чаро?
Ба ин далел, ки 12 сол мешавад Яман ва фурудгоҳҳояш аз сӯйи Арабистони Саудӣ таҳрим аст ва ҳар ҳавопаймое ба онҳо биёяд, мавриди ҳамла қарор мегирад. Ва тайи ин 12 сол, ин фурудгоҳҳо ва ба иловаи зерсохтҳои Яман, пайваста мавриди ҳамалоти ҳавоии ҷангандаҳои саудӣ ва омрикоӣ ва исроилӣ қарор гирифта ва тайи он, ҳазорон (на даҳҳо ё садҳо, балки ҳазорон) нифар инсон то ин муддат ҷон бохтаанд.
Ин ҳама ҷиғу доду фарёд ва ин ҳама даъват карданҳо ба “ҷиҳод”, ки аз сӯйи мубаллиғони салафӣ сурат мегирад, дар ҳангоми ҳамалоти саудиҳо ба фурудгоҳҳои Яман – ки охиринаш ҳамин имшаб сурат гирифт – куҷо буд ва чаро шунида нашуд?! Ё яманиҳо “одам” нестанд ва ҳаққу ҳуқуқе надоранд?!
Яман ба канор, аммо вақте Ғазза аз сӯйи режими Исроил мавриди ҳамла қарор гирифт ва имрӯз чизе дар он боқӣ намонда ва ба хок яксон шудааст, куҷо буданд ин уламои салафӣ, ки ингор кӯр буданд ва ҳеч даъват ба ҷиҳоде ва ҳеч ҳамосае аз онҳо дида нашуд?!
Бинобар ин, дуруст ба ҳамин далел, яъне ба далели дурӯя ва мунофиқ будани шумо, оқоёни салафӣ, ки агар ба нафъатон буд, фатво содир мекунед ва агар на, сокит менишинед, дуруст ба ҳамин далел, яманиҳои мазлум ва ситамдида пирӯзанд ва шумо шикаст хоҳед хӯрд!
Сайидюнуси Истаравшанӣ
Тоҷнек
